Для віцебскага творцы звыклая традыцыя – пахадзіць па выставачных залах з мольбамі выставіць ягонае мастацтва. Асабліва для творцы маладога. Рознае можна было пачуць за дзьвярыма культурных ўстаноў маладзёну пару гадоў таму: “Нефармат”, “Немэтр”, “Зала распісаная на тры месяцы наперад”.

Без рамак, афішаў і магчымасцяў хоць у нейкі капыл прыцягнуць на свой бенефіс залу спажывальнікаў некаторыя вырашалі ўвогуле не траціць нервы на афіцыйныя ўстановы, а праводзілі выставы на бацькоўскім лецішчы ці ў лесе за Лучосай. Якая розніца, адкуль будуць фота ў інтэрнэце.

Але выдае на тое, што культура нашага гораду паволі адчыняе свае дзверы. Яшчэ колькі мастацкіх пляцовак у адносным цэнтры Віцебску і на бліжэйшыя дзесяцігоддзі праблема доступу будзе вырашана: месца хопіць і для студэнта з бурсы і для рамесніка-залатара. Абы войт не замінаў.

Адна з ластавак новых трэндаў – запрашэнне былога “Задзвіння” мастакоў і творцаў усіх катэгорый выстаўляцца і рэалізоўвацца. Калі гэта для вас актуальна, то больш падрабязную інфармацыю знойдзеце ніжэй у абвестцы.

Цэнтр народных рамёстваў і мастацтваў “Дзвіна” знаходзіцца ў цэнтры горада, у гістарычнай частцы Віцебска. Пад выставачныя плошчы аддадзены помнік архітэктуры XVIII ст., у якім калісь знаходзіліся сяляныя склады, ці т. зв. “лабазы”.

Залы Цэнтра прыстасаваныя пад часовыя выставы дэкаратыўна-прыкладнога і выяўленчага мастацтва; на падворку праводзяцца святы, тэатралізаваныя прадстаўленні, кірмашы, канцэрты. У будынку працуе кафэ з нацыянальнай беларускай кухняй.

Акрамя таго штодзённа наведвальнікам прапануецца: знаёмства з мастацтвам віцебскіх рамеснікаў у творчых майстэрнях; урокі практыкі майстэрства і майстар-класы па народных рамёствах; выступленні ансамбля “Сябрына”, клубаў гістарычнай рэканструкцыі і мадэліравання “Нагльфар” і “Паўночная вежа”, узорнага ансамбля народнай музыкі “Жалейка”.

Запрашаем да супрацоўніцтва ў выставачнай дзейнасці мастакоў жывапісу, графікі, дэкаратыўна-прыкладнога мастацтва, фатаграфіі, а таксама творчыя аб’яднанні і народных майстроў.

А таксама прапаноўваем наведаць:

Выстава маладых фотамастакоў “АБ’ЕКТЫЎная зіма” з 15.12.2010 г. па 16.01.2011 г. Спроба аб’яднаць адчуванні зімы маладымі фатографамі. 

Выстава дзіцячай творчасці “Казкі Раства” з 24.12.2010 па 23.01.2011 г. Святочная выстава твораў выяўленчага і дэкаратыўна-прыкладнога мастацтва дзіцячых гурткоў і аб’яднанняў г. Віцебска.

Навагодняя праграма “Пасад Мароза ля Дзвіны” з 27.12.2010 г. па 07.01.2011 г. Вас чакаюць: гульня-вандроўка “У пошуках Мароза Марозавіча”, віншаванне ад Мароза Марозавіча, экскурс па выставе “Казкі Раства” (па папярэдняму запісу); святочны кірмаш сувенірных вырабаў віцебскіх рамеснікаў.

Мы знаходзімся па адрасе: Віцебск, вул. Чайкоўскага 3, 5. Тэл./факс (0212) 36-05-81, 37-00-62. Працуем штодзённа з 10.00 да 18.00. Выхадныя: панядзелак, аўторак.