Слова “кеды” паходзіць ад назвы амерыканскай абутковай фірмы “Keds”, якая была заснавана у 1916г. і спецыялізавалася на выпуску спартовага абутку. На сённяшні дзень кеды сталі неад’емнай часткай паўсядзеннага жыцця моладзі ва ўсім свеце. Віцебская моладзь не выключэнне: колькасць хлапцоў і дзяўчат, апранутых у кеды, ліку не паддаецца.

Кеды – гэта стыль жыцця. А для добрага жыцця патрэбны добрыя кеды. Зразумела, можна схадзіць на Полацкі рынак і за 80 тыс. набыць нікому не вядомыя Abibas. Няма гарантыі, што праз тыдзень яны не парвуцца і не кануць у лету, але ж затраты часу і грошай застануцца мінімальнымі. Аднак, згадзіцеся, нашмат прыемней набыць рэч брэндавую. Тут і якасць, і задавальненне, і пачуццё прыналежнасці да сусветнай моладзевай культуры. Але ж ці лёгка гэта – знайсці кеды знакамітых марак у Віцебску? І калі знойдзеш, як шмат яны будуць табе каштаваць? Адказ на пытанне я шукала ў такіх буйных гандлёвых кропках гораду, як "Беларусь", "Кантынент", "Эвіком" і "Еўропа".

Вядома, кеды для паўсядзеннага карыстання выпускаюць такія вядомыя кампаніі, як Adidas, Converse, Сamelot, Draven, Levi's, Nike, Reebok і інш. У свіах пошуках я вырашыла зрабіць націск на класічныя Converse.

Шукаць кеды ў “Беларусі” ( а пачала я менавіта з гэтага гандлёвага цэнтру) мне падавалася самым цікавым: тут ёсць фірмовы ралет Сamelot і даволі вялікі буцік моладзевага абутку Mshoes TV.

Mshoes TV выглядае так, які і належыць моднай моладзевай краме: выбар кедаў тут вялікі і кожны можа знайсці абутак па-сабе, сярод марак-вытвоцаў - Reflex, Baas і інш. Кошты ад 150 тыс. і вышэй. Не страшныя, як бачыце, кошты. Аднак, на маё пытанне, ці бываюць у продажы класічныя Converse, лагатып якіх “смачна” ўпрыгожвае буцік з наружнага боку, прадавачка дала адмоўны адказ.

А вось Сamelot не расчараваў. Тут можна набыць кеды ад 109 тыс. як звычайны класічны фасон самых розных колераў, так і скураныя. Кошты, канешне, вышэй, але не на шмат: ад 149 тыс. Тут, як і паўсюдна, абутак made in China, аднак брэнд ёсць брэнд.

У “Беларусі” ўсё. Можна яшчэ знайсці шмат марак ці фасонаў, раскіданых па самых розны ралетах, такіх як “Жаночы абутак” альбо проста ралет №х, аднак сусветнавядомая марка (а не яе чарговая падробка) наўрад ці патрапіць вам у рукі.

Наступным пунктам прызначэння для мяне стаў “Кантынент”. Тут наогул было ўсё складана. Модныя на сённяшні дзень мадэлі – бяры не хачу, аднак хацелася б пафарсіць у брэндавым абутку. Абхадзіўшы ўсе паверхі і так нічога і знайшоўшы цікавага, ужо ў роспачы, я патрапіла ў Camelot. Стала трохі весялей. Выбар адрозніваўся ад ралета гэтай жа маркі ў “Беларусі”. Больш кедаў з калекцыі “Вясна-лета-2011”, тыя, што з кветачкамі (Shipr), па коштах ад 159 тыс.

Канечне, я не магла абмінуць увагай “Мекку” тых, хто мае дастаткова добры густ, аднак не заўсёды мае дастаткова грошай: на сваім шляху я збочыла на “Эвіком”. І знайшла амаль тое, што шукала: кеды Converse заўважаны не былі, а вось Reflex, Baas, Adidas – калі ласка. Кошты ад 250 тыс. і вышэй. Асабліва парадваў прадавец кедаў Reflex. На маё здзіўленнае: ”Што, сапраўды з ЗША?!” ён весела пачаў расхвальваць “сапраўдны брэнд”. Паказаў новую мадэль, што зусім нядаўна паступіла ў продаж, і запэўніў, што хутка ў яго можна будзе набыць шмат рэчаў з новай калекцыі. Праўда, кошты на іх пакуль невядомыя. Ну што ж. Пакуль чакаем.

А вось “Еўропа” сталася самым сумным мейсцам для пошуку кедаў сусветнавядомых брэндаў. Адзіная вядомая марка кедаў, што патрапіла ў рукі - Levi's. Прычым прадавец адразу папярэдзіў: кеды каштуюць шмат. Так, пара чорных кедаў каштавала 90 у.а. Вось і атрымліваецца спачатку - паспрабуй знайдзі, а знайшоўшы – паспрабуй набудзь.

Хаця, хто шукае, той заўсёды знойдзе.

Даведка: Кеды Converse Аll-Star, упершыню вырабленыя напачатку XX ст. У далекім 1917 г. кеды вельмі спадабаліся баскетбалісту Чаку Тэйлару, спартовец прыняў актыўны ўдзел у кампаніі па рэкламе новага абутку, і з таго часу на эмблеме можна пабачыць яго імя і аўтограф.

vizh