У пятніцу 25 лістапада да нас у Віцебск завітаюць дзве далека не апошнія асобы з беларускай “калекцыі” дзеячоў сучаснага мастацтва: Валянціна Кісялёва і Сяргей Шабохін. Творчая сустрэча з імі адбудзецца а 17-й гадзіне ў Выставачнай зале Цэнтра сучаснага мастацтва (вул. Белабародава, 5. Плошча Перамогі). Запрашаюцца ўсе ахвотныя: мастакі, фатографы, мастацтвазнаўцы, арт-куратары, музеёлагі, крытыкі, мастацкія ініцыятывы. Будзе магчымасць не толькі паслухаць, але і падыскутаваць, навязаць кантакт і прапанаваць супрацу.

Валянціна Кісялёва – саўладальнік, дырэктар, куратар праектаў галерэі сучаснага мастацтва “Ў”. Галерэя «Ў» – гэта актыўная арт-пляцоўка, якая яднае ў адной прасторы галерэйную залу, краму аўтарскіх і дызайнерскіх рэчаў, кнігарню і ўтульную кавярню для наведвальнікаў. «Ў» – гэта атмасфера вольнай культуры, дзе кожны можа пазнаёміцца з актуальнымі, сучаснымі напрамкамі ў мастацтве, наведаць лекцыі вядомых мастацтвазнаўцаў, узяць удзел у майстар-класах. Валянціна распавядзе пра гісторыю ўзнікнення галерэі і яе дзейнасць за два гады працы, прапануе схемы супрацы з віцебскімі мастакамі і арт-ініцыятывамі.

Сяргей Шабохін – мастак, куратар, галоўны рэдактар партала аб сучасным беларусім мастацтве ART AKTIVIST. Сяргей распавядзе гісторыю стварэння і планы галоўнага ўзкаспецыялізаванага рэсурсу аб сучасным мастацтве на Беларусі, а таксама прапануе калегам шляхі ўзаемадзеяння з часопісам.