Мультыплікацыйнай казцы "Выцінанкі-выразанкі" ўжо больш за паўгады. Слаўны беларускі аніматар Міхаіл Тумеля захапіўся старадаўнім беларускім рамяством выцінанкі пасьля знаёмства з Вячаславам Дубінкай - легендарным майстром, які ўжо напрацягу 30 гадоў аднаўляе гэтае папяровае мастацтва. Да шэдэўру на музыку "Тройцы" у стылі "выразанкі" - а мультыплікацыйныя элементы на кампутарным экране таксама прыходзіцца літаральна выразаць - была сэрыя работ у гэтай жа тэхніцы пад назвай "Беларускія прымаўкі". Закіды крытыкаў аб прымітаўнасьці сюжэту тых мультфільмаў былі можа й слушныя, але калі палічыць прымаўкі за сваеасаблівую спробу сілаў перад "зайцам-сватам", то ў адным блоку выглядаюць яны эвалюцыйна арганічна. І "Выцінанкі-выразанкі", хутчэй, не апошняя прыступка, бо паводле М. Тумелі ён яшчэ не стаміўся спазнаваць той незвычайны сьвет спалучэньня народнага рамяства і сучаснай анімацыі.

Яшчэ колькі дэталяў.

• Мультфільм ужо пасьпеў узяць прыз на рэспубліканскім фэстывалі (хаця ў нашым не дужа багатым на якасную анімацыю краі было б дзіўным адваротнае). 
• "Беларусьфільм" не хавае галавы ў пясок інтэлектульнай уласнасьці і падае ю-тубаўскую спасылку наўпрост на сваім афіцыйным сайце, таму і тут вы яго глядзіце 100% легальна.
• Арыгінал песьні-казкі "Тройцы", які гучыць у мультфільме, можна адшукаць на, бадай, самым "зразумелым" іх альбоме "Жар-жар".
  
  Прыемнага прагляду!