Шматвяковая гісторыя за 5 хвілін -- ці магчыма гэта? Так! -- кажа кампанія “Будзьма беларусамі!” і запрашае ўсіх на шырокую прэзентацыю мультыплікацыйнага фільма “Будзьма беларусамі!”, якая адбудзецца 11 чэрвеня падчас опэн-эйра “Канцэрт на траве”.

Доўгачаканы анімацыйны фільм “Будзьма беларусамі! дае магчымасць паглядзець на нашую гісторыю ў новай, сучаснай графіцы. Аўтары ідэі -- Юлія Ляшкевіч і кампанія “Будзьма беларусамі!” -- увасобілі гісторыю Беларусі ў лёгкай, даступнай кожнаму форме. Шыкоўная анімацыя ад Юліі Рудзіцкай у музычным суправаджэнні Аляксандра Памідорава і Лявона Вольскага -- такой гісторыі Беларусі вы яшчэ не бачылі!

Болей за тое, гасцей фестывалю кампанія "Будзьма беларусамі!" чакае ў сваім намёце, дзе рыхтуе для ўсіх тузін культурна-забаўляльных мерапрыемстваў. Менавіта ў намёце “Будзьма беларусамі!” размесціцца інфацэнтр фэсту. Тут госці змогуць атрымаюць усю інфармацыю пра расклад опэн-эйра, пры неабходнасці даць абвестку ды перапісаць на свае флэш-носьбіты новы мульцік і іншыя медыя-прышпілы ад “Будзьмы”.

Насычаная праграма падрыхтаваная не толькі для дарослых, але і для дзетак, якіх чакае адмысловая праграма. Бавіць час у добрым настроі ў намёце “Будзьма!” можна будзе ад самага ранку: усе ахвотныя змогуць зрабіць сабе бодзі-арт, згадаць на практыцы, як вырабляць папяровыя капелюшы, ці ўзяць майстар-клас па лепцы з гліны ды народных танцах і шмат іншых цікавостак і сюрпрызаў.

Пасля прэзентацыі мультыплікацыйны фільм назаўжды атрымае прапіску па адрасе tut.budzma.org, адкуль яго змогуць спампаваць усе ахвотныя!

http://budzma.org/

Опэн-эйр "Канцэрт на траве", запланаваны на 28 траўня на хутары "Шаблі", пераносіцца на 11 чэрвеня. У сувязі з тым, што зарэгістравалася вельмі вялікая колькасць ахвотных узяць удзел у мерапрыемстве, узнікла неабходнасць дадатковага ўзгаднення з мясцовымі ўладамі.

Фестываль пераносіцца без зменаў у музычнай праграме. Усе набытыя квіткі застаюцца ў сіле. Аргкамітэт фестывалю прыносіць усім свае прабачэнні за ўзніклую нязручнасць і чакае гасцей у тым жа месцы (хутар “Шаблі”) 11 чэрвеня з добрым летнім настроем!