Увосень па вэб-прасторах разьнесься трэйлер новага фільма братоў Коўэн “Сур’ёзны чалавек” (“А Serious Man”). Незнаёмы са спэцыфікай “іншага” кіно глядач мог падумаць, што ў хуткім часе яго чакае тонкая, інтэлектуальная і вельмі сьмешная камедыя. Настолькі сьмешная, што пад час прагляду гарбату перад маніторам ўжываць будзе не пажадана. Высокаэстэтычную асалоду спажываньня перадвызначаў саўндтрэк, што выскокваў напрыканцы – на тытрах трэйлера каралі псыхадэлікі з Jefferson Airplane аджыгалі свой неўміручы “Somebody Love”.

Што мы атрымалі па фіналу? Мы атрымалі шэдэўр, гэта бясспрэчна. Але гэта далёка ня тая, няхай і таленавітая, але ржака, якую прадракаў трэйлер. Першы цэтлік, які варта прапісаць насупраць твору братоў Коўэн – гэта калісьці надзвычай блізкае віцебскай культуры “Рэбэ”. Увесь фільм пранізаны правіламі, вобразамі і сімваламі штатаўскага “кагалу” канца 1960-х. Габрэйская школа, габрэйскія сем’і, габрэйскі развод (ва ўсіх значэньнях). Рэжысэры малююць палатно з дапамогай сарказму, чорнага гумару і звышхарактэрных пэрсанажаў.

Другі цэтлік – гэта “Troubles”. Яны складаюць сюжэтную лінію фільма, прымушаючы галоўнага героя Лоўрэнса Гопніка (Lowrence Gopnik) у рэшце зьвяртацца па псыхалягічную дапамогу да прадстаўнікоў папярэдняга цэтліку. Пакуль “Рэбэ” даюць парады, “Troubles” працягваюць валіцца на героя: жонка падае на развод, дзеці цягнуць грошы з бацькоўскага гаманца, кіраўніцтву каледжа дасылаюць на прафэсара Гопніка непрыемныя ананімкі, роднаму брату ўвесь час пагражаюць вартаўнікі закону і парадку, а сусед-гой не зьбіраецца мірна ўжывацца з Лоўрэнсам.

Апошні цэтлік – гэта “60-ыя”. Героі фільма катаюцца па вуліцах на вялізных амэрыканскіх баржах-аўтамабілях, у хатах лінзы-тэлевізары паказваюць манахромнае кіно, Тору слухаюць на вініле, а на занятках сын Лоўрэнса хавае тагачасны ай-под за кніжкай – вялізны, карычневы, з круцёлкай і белым (!) навушнічкам. Шкаляры ва ўсю гандлююць марыхуанай і рандэву зь ёй не прамінаюць як бацька, так і сын. Нават сам рабін Маршак цытуе Jefferson Airplane: “When the truth is found to be lies, and all the hope within you dies” …Grace Slick, Marty Balin, Paul Kantner, Jorma Kaukonen [удзельнікі гурта]… These are the members of the Airplain”. Думаю, тлумачыць шматварыянтнасьць значэньняў слова “аэраплян” ня трэба.

Суб’ектыўны бал: 8 (з 10)
Суб’ектыўныя парады: у кіно не хадзіць, аднаму не глядзець.